• Сайт города Волковыска - новости города, района, Беларуси.

#Геніюш2016. Стартавала кампанія за рэабілітацыю Ларысы Геніюш

Моладзь БНФ распачала кампанію за рэабілітацыю беларускай паэткі і грамадзкай дзяячкі Ларысы Геніюш.

Кампанія пачалася 5 ліпеня і на раніцу 11-га было сабрана ўжо каля 200 подпісаў за поўную рэабілітацыю беларускай паэткі.

Як паведамляецца на старонцы кампаніі Укантакце, свой подпіс на гэты момант можна паставіць на пікетах у Менску, на офісе Партыі БНФ, у Гомлі, Берасці, Воршы і Магілёве. Усе навіны кампаніі будуць публікавацца пад хэштэгам #Геніюш2016.

Акрамя збору подпісаў за рэабілітацыю актывісты Моладзі БНФ збіраюцца праводзіць і іншыя мерапрыемствы.

«Мы будзем займацца папулярызацыяй творчасці Ларысы Геніюш, будзем звяртацца да Міністэрства адукацыі з тым, каб творчасць Ларысы Геніюш была ўключана ў школьную праграму. Будзем праводзіць урачыстыя мерапрыемствы — вечарыны памяці, літаратурныя чытаньні і г.д.», — распавядае актывістка Моладзі БНФ Кацярына Шуст.

Моладзь БНФ таксама будзе дамагацца стварэння помніка Ларысе Геніюш і перайменавання адной з вуліц у яе гонар.

Ларыса Геніюш (1910-1983) — беларуская паэтка, пісьменніца, дзяячка нацыянальнага руху. Была арыштаваная 5 сакавіка 1948 г. органамі МДБ у Чэхаславаччыне, з кастрычніка 1948 г. знаходзілася ў турме ў Менску. 7 лютага 1949 г. Ларысу Геніюш асуджаюць на 25 гадоў зняволення паводле артыкулаў 66 і 76 Крымінальнага кодэксу БССР «контррэвалюцыйная арганізацыйная дзейнасць» i «дапамога міжнароднай буржуазіі ў ажыццяўленні варожай дзейнасці».

У 1956 годзе тэрмін пакарання змяншаюць да 8 гадоў, і яе вызваляюць. Пасля вызваленьня доўгі час творчасць паэткі была пад забаронай. Толькі ў 1967 годзе быў выдадзены першы ў Беларусі зборнік твораў Ларысы Геніюш.

Паводле Радыё Свабода


Только авторизованные пользователи могут оставлять комментарии!

Войдите Или зарегистрируйтесь