У Краснасельскім адзначылі Дзень будаўніка (ФОТА, ВІДЭА)

У нядзелю ў Беларусі адзначаць сваё прафесійнае свята будаўнікі. Па традыцыі ў гп. Краснасельскі, нягледзячы на цяжкасці, свята адзначаюць з размахам. Усім не дагодзіш. Камусьці больш па душы святочны салют, камусьці як спяваюць Саша Немо ці Аляксей Хлястоў. Ды і кантрольныя органы ў апошні час самі губляюцца — ці то заахвоціць арганізатараў за салют, ці то больш строга спытаць, навошта выстрэльваюць ў неба чысты прыбытак. Так ці інакш, але святу на цэмзаводзе быць заўсёды!

Тым больш, што і падстава была. У ходзе суботняга візіту ў Ваўкавыск кіраўніка дзяржавы, сярод іншых, цікавіла пытанне, як развіваецца ААТ «Краснасельскбудматэрыялы». Дырэктар акцыянернага таварыства Валянцін Вераціла далажыў Прэзідэнту, што прадпрыемства мае намер выйсці на прыбытковую працу да канца 2016 года. «Мы ўтрымаліся на рынках, нарошчваем экспарт, плацежаздольнасць прадпрыемстваў палепшылася, таму да канца года выйдзем на прыбытковую працу. Ужо сёння Br13,5 млрд (недамінаваных рублёў) чыстага прыбытку мы атрымалі ад рэалізацыі прадукцыі па выніках чэрвеня. І нарошчваем аб’ёмы вытворчасці цэменту», — сказаў кіраўнік прадпрыемства.

Святкаванні ў гарпасёлку пачаліся яшчэ ў сераду і чацвер з ушанавання юбіляраў па стажу працы і пенсіянераў, і працягнуліся ў пятніцу ўрачыстым сходам.

У суботу адбыліся спартыўныя спаборніцтвы, працавала фотавыстава «Гістарычныя замалёўкі» вачыма фатографа Уладзіміра Антонава.

Вялікую цікавасць выклікаў конкурс сярод філіялаў «Нам ідэя тварыць дапамагае».

zem_rom0.