Намеснік старшыні Лідскага райвыканкама затрыманы з доказамі злачынства пры атрыманні хабару, паведамілі ў Гродзенскай абласной пракуратуры.

Двух чыноўнікаў затрымалі проста на вуліцы. Паведамляецца, што затрыманым аказаўся намеснік старшыні Лідскага райвыканкама, які курыруе пытанні ідэалогіі, маладзёжнай палітыкі, друку і СМІ, культуры, спорту і турызму і іншыя. Разам з ім затрыманы таксама старшыня Траццякоўскага сельсавета.

Службовых асоб падазраюць у атрыманні хабару за садзейнічанне ў атрыманні бясплатных віз іншым асобам.
Устаноўлена, што яны ўключалі ў спісы на атрыманне бясплатных віз для спартыўных каманд і народных калектываў людзей, якія не маюць да спорту і музыкі ніякага дачынення.

Паведамляецца, што ў межах крымінальнай справы фігуруюць некалькі дзясяткаў псеўдаспартсменаў і псеўдамузыкантаў, усе яны атрымалі бясплатныя візы для ўдзелу ў спартыўных спаборніцтвах і музычных фестывалях.

БЕЛТА