Парафіяльны фэст у Шылавічах

16 чэрвеня 2013 года у шылавіцкім касцёле Найсвяцейшай Тройцы прайшоў парафіяльны фэст, на які сабраліся жыхары Шылавіч, навакольных вёсак і госці.

Наведвальнікаў мерапрыемства чакалі конкурсы, гульні, канцэрт мясцовай самадзейнасці, кірмаш салодкіх вырабаў і народных майстроў. Трэба адзначыць, што фэст меньш за ўсё быў падобны на релігійнае мерапрыемства, хіба толькі ў тым, што на пляцоўцы ні было нецвярозых і курцы выходзілі паліць за браму. Сёстры пяклі і гандлявалі салодкімі пачастункамі, печывам, ксёндз «катаў» салодкую вату, у яго гаражы зроблены цір, дзе можна было пастраляць з пнеўматычнай вінтоўкі. Сродкі, якія сабралі на фэсце, пойдуць на рамонт касцёла. Гэта куды болей цікава, чым скрыня на ахвяраванне ў краме.

Нас, як жыхароў горада, вельмі ўразіла колькасць людзей, іншае свята не збірае столькі удзельнікаў і ў Ваўкавыску. Вельмі шмат было моладзі, дзяцей, пажылых людзей з навакольных вёсак прывезлі на аўтобусе. Асаблівую цікавасць выклікаў канцэрт мясцовай самадзейнасці, які, як заўсёды, прайшоў на высокім узроўні.

Гэта вельмі добры прыклад мясцовага самакіравння, калі людзі не чакаюць «высокіх цыркуляраў» ад уладаў, а робяць прыемныя рэчы самі сабе.

Фото: Vladus