У Свіслачы ўшанавалі памяць паўстанцаў 1863 года (ФОТА)

У горадзе Свіслач адбыўся фэст, прысвечаны памяці паўстанцаў 1863 году. На яго з’ехаліся каля сотні актывістаў з розных гарадоў Беларусі. Сёлета мерапрыемства праходзіць ужо ў 21 раз.

Удзельнікі наведалі магілу Віктара Каліноўскага, усклалі кветкі на магілу мясцовага актывіста Віктара Дзясяціка, намаганнямі якога 20 гадоў ладзіўся фэст. Таксама група ўдзельнікаў шэсця са сцягамі выступіла перад помнікамі Кастусю Каліноўскаму і Рамуальду Траўгуту, апошняму з кіраўнікоў паўстання. Затым удзельнікі накіраваліся ў радавую сядзібу Каліноўскіх — вёску Якушоўку.

У Якушоўцы ля памятнага крыжа выступілі Павел Севярынец, Рыгор Кастусёў, Вячаслаў Сіўчык, Уладзімір Хільмановіч, Аляксей Янушкевіч, Аляксандр Мех. Пасля чаго пачалася нефармальная частка фэсту з удзелам бардаў.

Само мерапрыемства прайшло пад пільным наглядам супрацоўнікаў праваахоўных органаў. Фактычна праводзіць фэст яны не заміналі, але фіксавалі ўсё на камеры.